Mga tunghaan ipasusi

Gimando karon ni Cebu City Police Office Director Supt. Melvin Gayotin ngadto sa tanang hepe sa police stations sa pagsusi matag karon ug unya sa mga tunghaan sa ilang hurisdiksyon ilabi na sa mga night high schools.

Kini human makadawat kagahapon sa buntag ang direktor og suwat-reklamo gikan sa Don Vicente Rama National Night High School kabahin sa presensya sa mga batan-ong mag-estambay gawas sa ilang tunghaan ug nangrekrut og mga tinun-an sa ilang gang diin ang ubang mga tinun-an nangahadlok.

Si Gayotin sa pakighinabi sa Banat News nagkanayon nga mao pa kini ang labing unang higayon nga dunay reklamo nga nadawat kabahin sa fraternity ug gang sukad nga nagsugod ang klase.

Matud pang Gayotin nga uyon siya sa curfew sa mga menor de edad aron mahunong na ang susamang paglulinghayaw sa mga bata diha sa kadalanan ilabi na kadtong walay mga klase nianang gabhiona. - Edwin Ian Melecio