Hepe sa Asturias mibuhi sa pusher

Nag-atubang karon og imbestigasyon sa hepe sa kapolisan sa lungsod sa Asturias, Insp. Noli Cernio, human gibuhian ang usa ka dinakpan sa kaso sa pagpayuhot og shabu nga wala napasakai og kiha.

Ang Deputy Director for Administration sa Police Regional Office 7, S/Supt. Ronald Roderos, ang niluwat og kamandoan sa pagpaesplikar kang Cernio sa maong taho.

Usa ka reklamo ang nadangat sa buhatan ni Deputy Director for Operation, S/Supt. Lani-O Nerez, gikan sa usa ka concerned citizen sa barangay Sta. Lucia, Asturias niadtong Hunyo 5, 2006.

Ang suwat nagpahibawo nga usa ka Richard Estela, 28 anyos, ulitawo nga nagpuyo sa maong lugar ang nadakpan nilang PO1 Manuel Blones ug PO1 Gerald Awit niadtong Mayo 21, 2006 sa kasong pagpayuhot og shabu.

Apan ang dinakpan giingong gibuhian lang sa kapolisan nga wala pasakai og kaso.

Ang kamandoan ni Roderos gipadangat sa Cebu Police Provincial Office kagahapon ug gipadala usab dayun ngadto sa buhatan sa kapolisan sa lungsod sa Asturias aron matubag ni Cernio sulod sa 24 oras.