Trike driver gikaselosan gipusil-patay

Usa ka tricycle driver nga gikasinumbagay sa nangabubhong silingan gipusil ug namatay sa miaging kaadlawon sa dalan Echevarre, Mantuyong, Mandaue.

Ang biktima mao si Raquelito Garciano, 32, ulitawo nga nagpuyo sa maong dapit.

Ang suspetsado mao si Anastacio Gulayan, hingkod ang panuigon, minyo ug silingan usab niini.

Si PO2 Estephane Amamag-id sa Presinto 1 miingon nga si Gulayan dali nga nakasibat pahilayo.

Matud pa ni PO2 Amamag-id nga sayo untang nagpaingon ang biktima sa pagkuha og tubig sa puso nga nahimutang usab sa maong dapit sa dihang giatangan kini sa suspetsado ug gisukmatan nga gikarelasyon niini ang asawa.

Nahitabo ang panaglalis ug nagkasinumbagay ang biktima ug suspetsado.

Si Amamag-id miingon nga gilupig ang suspetsado sa sinukliay sa kinumo ug mipauli.

Mibalik ang suspetsado nga nagdala na sa wala matinong kalibre sa armas ug gipusil ang biktima sa makausa ka higayon.

Naigo ang biktima sa liog nga maoy nakaingon sa hinanaling kamatayon ug dali usab nga misibat pahilayo sa maong dapit ang suspetsado.