Si Supt. Efren Nemeño sa pakighinabi sa mga tigbalita kagahapon mibutyag nga aksidente ang nahitabo ug di tinuod ang pagduda sa mga kabanay nga gituyo ang pagpakuryente sa mga priso.
Nagduda ang ubang mga kabanay sa mga biktima ug sa mga naluwas nga gituyo gyud ang pagpakuryente sa mga biktima sanglit wala sila tuguti dayon kagahapon sa buntag nga makaistorya ang mga naluwas nga bilanggong kauban sa lima ka namatay
"It was a freak accident, wala gyuy foul play kay kung duna pa patay gyud silang tanan, madamay pa ang gwardiyang miresponde, pero aron mawagtang ang pagduda ato nang imbestigahan," asoy pang Nemeño.
Ang maong selda maoy selda kaniadto ni Philippine Benevolent Missionaries Association supremo, Ruben Ecleo Jr. ug sa kanhi polis nga si Engelberto Durano nga kaniadto nahimong kontrobersyal gumikan sa kadaghan sa mga appliances diha sa sulod nga gikunsiderar nga kontrabando sa mga prisuhan.
Duha na ka semana ang nakalabay ang maong selda nga dunay gibana-banang tulo ngadto sa upat ka metro kwadrado ang gilapdon giukopar og 30 ka mga priso apan nabalhin ang uban human gikumbirtir ang usa ka opisina ngadto na sa karsel.
Matud pang Nemeño kun wala pa mabalhin ang maong mga bilanggo posibleng mas dako ang tsansang daghan ang mamatay (basaha ang banner story).
Gibasol ni Nemeño ang mga priso nga maoy magkuri-kuri sa mga wirings diha sa bilanggoan, apan miangkon ang opisyal nga gumikan usab kini sa kahuot sa bilanggoan nga nakaingon sa grabeng alimuot sa nagdasok nga mga bilanggo.
Sa pagkakaron ang BBRC dunay dul-an 3,000 ka mga priso apan gidisenyo lang kini alang sa 250 ka tawo. Sa pagkakaron gipaabot pa nga matapos ang gitukod nga bag-ong BBRC sa Kalunasan aron kabalhinan sa mga bilanggo.
Usa sa mga survivor sa aksidente mao si Joseph Aripal nga gikahinabi sa Banat News nagkanayon nga maisip niyang mao na kini ang ikaduha niyang kinabuhi ug gibasulan ang iyang pagpangawat sa electric fan sa iyang iyaan.
Gitug-an ni Aripal nga nahigmata lang siya sa pagsandig samtang natulog sa bungbong dihang lain na iyang paminaw nga nagkurog-kurog ang iyang lawas uban sa ubang mga priso maong mibarog siya ug diha na niya nakit-ang wala na maglihok ang lima ka kauban diha sa salog.
"Semi-electric chair gyud to sir," asoy pang Aripal. "Tiya mangayo ko og pasaylo kay nadaut ko sa bisyo ug sugo ra to sa kamot," mabasulong pamahayag ni Aripal sa mga sakop sa media kagahapon.