Wa pay mga terorista — Tablegs

Nakigtagbo ang kahugpungan sa mga Muslim dinhi sa siyudad sa Sugbo ngadto kang Mayor Tomas Osmeña aron tin-awon nga wala pay mga terorista ang nakasulod dinhi sa Sugbo.

Kapin sa napulo ka mga Tableg ang nakigtagbo kang Osmeña kagahapon nga gipangulohan ni Ustadz Haron Magadapa, imam sa Cebu Green Mosque ug Regional Chairman sa Halal Fatua Council.

Matud ni Magadapa dihang nahinabi sa mga tigbalita dunay 50 ka mga Muslim nangabot dinhi sa Sugbo niadtong petsa 1 niining bulana nga gilangkuban sa mga tableg ug mga negosyante gikan sa Maranao.

Dako ang pagtuo ni Magadapa nga posibleng mao kini gibasehan sa giluwatang pamahayag ni Mandaue city Mayor Thadeo Ouano nga dunay 80 ka mga sakop sa terorista ang nakasulod na dinhi sa Sugbo.

Sigun sa report ang maong mga terorista nagplanong magmugna og dakung kagubot aron dili magmalampuson ang Asean Summit karong bulan sa Disyembre nga tambungan sa mga presidente gikan sa lainlaing kanasuran.

Gipasalig ni Magadapa nga mga buotan, mahigugmaon sa kalinaw ug mahadlokon sa Labaw nga Makagagahom ang mga Muslim nga miabot dinhi sa Sugbo niadtong unang semana niining buwana.

Iyang gidugang nga dili angay'ng mabalaka ang publiko kun dunay mga Muslim nga moabot dinhi sa Sugbo nga magsul-ob og lubos puti nga sinina sama kanila gumikan kay dili kini mga terorista.

Gipasalig sab ni Magadapa nga hangtod karun wala pa gyud silay namatikdan nga dunay mga nakasulod nga mga terorista dinhi sa Sugbo.

Si Osmeña sa iyang bahin mihangop ug misabot sa gihimong mga pagpasabot sa kahugpungan sa mga Muslim.

Tungod sa lig-ong kooperasyon sa Muslim Community dinhi sa Sugbo misamot ang pagtuo sa mayor nga dili gyud makabasta-basta og sulod dinhi sa dakbayan ang mga terorista aron gubton ang umaabot nga ASEAN Summit.