Batang gisulod og sako naglutaw sa dagat

Usa ka patay'ng lawas nga gibanabanang 10 ngadto sa 15 anyos nga batang lalaki nga gisulod sa sako ug gibugkosan og itom nga electrical wire napalgan sa kadagatan sa Lipayran, Bantayan.

Ang patay'ng lawas nagsugod na og kadugta ug gimando na sa hepe sa kapolisan sa lungsod nga ipalubong na kini subay usab sa rekomendasyon sa municipal health officer nga si Dr. Liza Rivera tungod kay makadaut na kini sa mga tawo diha sa palibot.

Gisusi na karon sa kapolisan sa Asturias ang maong patay'ng lawas tungod kay niadtong milabay'ng semana usa ka batang 11 anyos ang gisulod og sako human gi-torture ug kuryente dayong gisulod ug sako ug gilabay sa sapa.

Si Al Quirante Miano nga giingong gikulata, gipakuryentihan ug gisulod sa sako ug gipaanod sa Guinabasan River sa Asturias dugay na nga gipangita.

Si SPO1 Godofredo Bondad sa kapolisan sa Asturias mitug-an sa Banat News nga mipadala na sila og imbestigador sa Bantayan aron pagsusi sa patay'ng lawas.

Matud pa niya nga sa mga paghulagway sa kapolisan sa lungsod sa Bantayan sa mensahe usab nga gipadangat ngadto kanila mitakdo sa patay'ng lawas nga napalgan sa mananagat sa maong lungsod.

Sa pakighinabi sa Banat News kang Inspector Ramon Amistoso, hepe sa kapolisan sa Bantayan nga ang mananagat nga si Eduardo Hamili maoy nakakaplag sa sako nga gibugkos sa itom nga electrical wire ug naglutaw kini sa kadagatan sa Lipayran alas 7 pasado ang takna sa buntag niadtong Domingo diin moabot usa ka oras kun mosakay og pumpboat gikan sa sentro sa ilang lungsod ang gilay-on.

Sa report ni Sr. Supt. Vicente Loot, hepe sa Cebu Provincial Police Office kang Gobernador Gwendolyn Garcia kagahapon nga nakompirmar nga lawas ni Miano ang maong lawas.

Karong adlawa si Garcia moadto sa Asturias alang sa pagpahigayon sa medical mission sa maong lungsod ug ingon man ang pagtunol og hinabang ug pahasubo sa pamilya sa gipatay.

Usa ka 16 anyos nga silingan sa biktima maoy miangkong mipatay sa biktima gumikan usab sa pasangil nga gikawatan kini sa gipatay. — Uban sa taho ni Brenda Batuto