Magsuon gi-absuwelto sa kasong rape

Giabswelto ni Regional Trial Court Judge Raphael Yrastorza Sr. sa branch 14 ang magsuong Concordio ug Maximo Laputan kinsa gipasakaan og kasong rape with homicide tungod sa kaluag sa mga pamahayag batok kanila sa main witness sa prosekusyon.

Ang korte mirekomendar usab sa prosekusyon sa pagpahikay sa mga dokumento ubos sa pagtugot sa Department of Justice aron mahatagan og P10 mil matag usa kanila si Concordio ug Maximo isip danyos.

Niadtong Septiyembre 2005, ang duha kinsa mga residente sa Carcar maoy gipasanginlang miunay sa paglugos ug mipatay ni Mylene Laputan, 13-anyos nga anak ni Concordio.

Ang maong insidente nahitabo diha sa Sityo Kamang-Kamang, Ocaña, Carcar.

Si Ronnie Tabora kinsa main witness sa kaso miduso sa iyang affidavit niadtong Septiyembre 2005 diha sa police station sa Carcar.

Si Tabora nagkanayon nga saksi siya dihang gilugos ang biktima ni Maximo ug Concordio ug naiwagan niya sa flashlight ang nawong sa biktima.

Matud ni Tabora nga si Maximo ug Concordio hubog dihang nahitabo ang insidente hinungdan nga wala na kini makaila sa biktima nga kaugalingon nilang anak ug pag-umangkon.

Apan sa affidavit ni Tabora nga giduso sa Commission on Human Rights miangkon kini nga miapil siya sa paglugos sa biktima apan wala niya kini isulti sa una niyang affidavit ug tungod sa pagkakunsensiya hinungdan nga sa ikaduhang affidavit na niya kini gibutyag.

Si Atty. Francisco Amit Jr. SA CHR maoy miayuda ni Tabora dihang miduso kini sa iyang affidavit sa Commission on Human Rights.

Ang testimoniya ni Tabora nakahatag og pagduda tungod kay wala kini magkaparehas.

Ang mga ebidensiya sama sa sapot, balili,naugang dugo, yuta ug hugaw sa kinatawo sa biktima nga nakuha gikan sa lugar gipaubos kini sa laboratory examination sa Crime Laboratory sa Philippine National Police sa Camp Crame. Base sa resulta sa laboratory examination, ang DNA lang sa biktima ang migawas nagpasabot nga si Maximo ug Concordio wala sa lugar dihang nahitabo ang insidente.