Mangaoang sekretong nag-birthday sa Parian

Si Cebu Customs District Collector Ma. Lourdes Mangaoang nagsaulog sa iyang adlawng natawhan uban sa mga streetchildren sa Parian drop-in center sa milabay'ng Biyernes.

Atol sa maong kasaulogan sa adlaw'ng natawhan ni Mangaoang uban sa mga street childrens kini mihatag ug bonga nga kaon, regalo ug kalingawan sa mga bata diin nagpadala kini ug duha ka clowns.

Ang maong selebrasyon gituyo ni Mangaoang nga walay bisan usa ka media ang gipahibalo niini aron nga mamahimong makasaysayanon kini alang kaniya ug dili mapublikar.

Si Street Children Foundation Chairman Margot Osmeña atol sa iyang pakigpulong namahayag nga ang gihimo ni Mangaoang usa ka dalaygong buhat ug usa ka memorableng butang alang sa mga kabataan.

Matud pa ni Osmeña talagsaon ang gihimo ni Mangaoang gumikan kay bisan sa dali nga panahon iyang nahatagan ug gipatilaw ang mga bata sa mga lamiang pagkaon inay nga adto kini niya ipakaon sa iyang mga halangdong bisita.

Gumikan niini, si Mayor Tomas Osmeña nga mitambong sa kasaulogan sa adlaw'ng natawhan ni Mangaoang nakigsalo usab sa mga kabataan.

Gawas pa niini mihatag usab og balor P50 mil si Mangaoang isip donasyon ngadto sa Parian drop-in center diin ang maong kantidad gikan sa District Collector of Customs Charity Funshoot sa Casey Gun Club sa Tambuli Beach Resort sa Lapu-Lapu.