Boarding houses buot ipa-inspeksyon sa kapitolyo

Duha ka magbabalaod sa Probinsya ang migama og resolusyon para sa kaayohan sa mga tinun-an.

Si Bokal Victor Maambong migama og resolusyon nga nag-awhag sa mga fire marshal sa probinsiya nga mopahigayon og inspection sa mga dormitory ug boarding house para masiguro kung dili ba mamilegro ang mga estudyante nga mopuyo niini kung dunay mahitabong sunog.

Base sa taho adunay mga establisamento nga wala makatuman sa rekisitos sa fire safety, walay mga fire extinguisher ug fire exit ang mga edipisyo nga gipatukod ug dilikado kaayo kung adunay mahitabong sunog tungod kay posibleng makaangin kini og kinabuhi.

Ang maong resolusyon gipaluyohan usab ni Bise-gobernador Gregorio Sanchez ug Bokal Agnes Magpale.

Sa laing bahin usab, si Bokal Juan Bolo migama usab og resolusyon nga nag-awhag sa Department of Education Regional Office 7 nga mohatag og pagbansay-bansay sa mga kwalipikadong magtutudlo kabahin sa Basic Life Support para sa kasiguroan nga luwas ang mga tinun-an kung adunay moigong mga kalamidad.

Matud ni Bolo nga ang kinabuhi sa mga kabataan kanunayng expose sa mga natural ug man-made nga kalamidad bisan og atoa sila sa tunghaan hinungdan nga ang mga magtutudlo angayang makamao sa procedure sa basic life support para mahatagan og kalinaw ang panghuna-huna sa mga ginikanan tungod kay makasalig man kini nga luwas ang ilang mga anak kung atoa kini sa tunghaan tungod kay ang mga magtutudlo makahatag man og ayuda sa kabataan panahon sa emerhensiya.