Senado gisaway ni JDV

Gisaway ni Speaker Jose de Venecia ang mga senador gumikan sa kapakyas sa paghimo sa ilang trabaho isip magbabalaod sa nasud.

Si De Venecia kinsa dinhi sa Sugbo niadtong miaging adlaw mipasabot nga kini maoy lig-ong basehanan alang sa pagwagtang sa senado kun matigayon ang Charter Change.

Matud pa ni De Venecia nga ang ubos Balay Balaoranan nga iyang pangulohan hangtod niining panahona ang nakapalabang na og mokabat sa 803 ka mga Balaudnon.

Samtang 12 lamang niini ang napalabang sa Senado nga maoy nakaingon sa pagkatanggong sa mga balaodnon nga makahatag unta og dugang kalamboan sa nasud.

Matud pa ni De Venecia nga mao kini ang nasinati sa nasud ubos sa Presidential-Bicamiral nga sistema.

Dako ang iyang pagtuo nga ang Charter Change nga iyang gitinguha nga mao ang Parliamentary-Unicameral maoy makasulbad niining suliran aron di na matanggong sa senado ang mga balaudnon.