Duha gipamusil, atraso ug frat gisusi

Duha ka lalaki ang nabiktima sa pagpamusil kagahapon sa kaadlawon sa wala mailhing mga suspetsado diha sa duha ka lugar sa dakbayan sa Talisay, unang insidente gikatahapan nga dunay kalabutan sa frat war ug ang usa atraso.

Ang unang pagpamusil nahitabo diha sa frenster disco bar sa Barangay Lawaan II.

Ang biktima giila nga si Arvin Barliso, 22-anyos taga Candulawan Lawaan III kinsa nakaangkon og samad pinusilan sa tuong abaga ug daling gidala ngadto sa Talisay District Hospital.

Si PO1 Alan Villasurda, polis sa Talisay sa pakighinabi niini sa Banat News kagahapon nagkanayon nga posibleng fraternity war ang hinungdan sa maong insidente.

Si Barliso ug ang suspetsado nagkaabot diha sa maong diskohan ug nagkasinukmagay diin misangpot sa pagpamusil.

Sa laing bahin, ang ikaduhang insidente nahitabo diha sa South Reclamation Road habig sa city hall diin usa ka James Bacasmas, 22, residente sa Tabunok maoy biktima ug naigo sa walang kilid ug nalandig sa Talisay District Hospital.

Si Bacasmas uban sa iyang mga higala nga naglingkod diha sa daplin sa karsada sa wala pa mahitabo ang insidente.

Duha ka wala mailhing lalaki nga nagsakay og motorsiklo ang miagi diha sa lugar og pagkatungod niini sa nahimutangan sa biktima sa mga higala niini, kalit lang kining namusil og dayong pasutoy sa motorsiklo pahilayo sa lugar.