Tanod gidunggab human siya pusila

Patay dihadiha ang usa ka barangay tanod human kini pusila ug gidunggab sa wala mailhing tawo pasado alas 6 sa miaging gabii sa Barangay Dumalan, bukiran sa Dalaguete.

Ang namatay giila sa kapolisan nga si Teresito Arriesgado Bralao, hingkod, minyo, tanod sa Barangay Obo Dalaguete, miyembro sa Bantay Lasang sa maong dapit.

Si Bralao gipusil kausa ka higayon sa wala matino nga kalibre nga armas sa wala mailhing taw. Sa wala pa matagbaw gihansakan sa makadaghan ang iyang kalawasan gamit ang kutsilyo nga maoy hinungdan nga namatay kini dihadiha.

Base sa pasiunang imbestigasyon ni PO2 Cirilo Glipa, nasayran nga gikan pa ang biktima nga mitambong og tigbakay sa maong lugar, apan sa dihang mipauli na kini paingon sa ilang pinuy-anan nga nag-inusara, giatngan kini sa mamumuno ug gipusil ug gidunggab sa dihang natumba.

Wala pa matino sa kapolisan kun pila kabuok ang samad nga iyang naangkon tungod kay gipaubos pa ang patayng lawas sa biktima sa autopsy sa municipal health officer sa lungsod sa pagsulat ning balita.