Buak ang ulo sa 45 anyos: Biktima palgan diha daplin sa sapa

Napalgang patay daplin sa sapa ang usa ka 45 anyos nga lalaki ug nabuak ang ulo niini human bunali og gahi nga butang sa iyang bayaw didto sa Barangay Pio, lungsod sa Tabugon sa miaging adlaw pasado alas 5 sa kabuntagon.

Gituohan sa kapulisan nga nahitabo ang krimen mga ala una ngadto sa alas dos sa kaadlawon.

Ang biktima giila mao si Felix Bostaleño lumad nga taga Pinayagan Tubigon Bohol, kasamtangan nanimuyo sa Barangay Maslog Tabogon kinsay dunay kapuyo sa maong lugar.

Samtang ang gitumbok nga suspetsado mao ang igsuon sa iyang kapuyo nga si Zeno Retubado hingkod nga taga Barangay Canaw-Canaw sa samang lungsod.

Matud pa sa kapulisan nga ang suspek ug ang biktima managbarkada tungod kay kanunay kining magkuyog bisan asa.

Si PO1 Dino Caputol sa Tabogon Police Station sa pakighinabi sa Banat News nagkanayon nga sa wala pa mahitabo ang pagpatay, giingong nagkuyog kini ug pulos na mga hubog.

Nianang pasado alas 5 sa buntag adunay nagpahibalo sa kapulisan nga adunay napalgang patay sa daplin sa sapa.

Ang biktima naabtan sa kapulisan daplin sa sapa nga naghayang na ug adunay daghang bun-og sa tibuok niyang kalawasan diha pay agi sa bunal sa iyang baba ug ang gituhoan sa kapulisan nga maoy gikamatyan niini mao ang dakong liki sa iyang ulo duol sa iyang dunggan.

Nakakuha ang kapulisan sa crime scene og usa ka gabas human sa maong insidente ang suspek daling misibat nga hangtod karon padayon pa ang gihimong hot pursuit operation.

Ang kapulisan padayon pang nag-imbestigar sa tinud-anay nga motibo sa krimen.