Ika-166 nga biktima sa vigilante gitumba

Usa ka tireman sa usa ka baligyaanan og ligid ang nahimong ika-166 nga biktima sa "vigilante style killings" niadtong gabii sa adlaw'ng Huwebes diha sa dalan M.J. Cuenco atubangan mismo sa iyang gitrabahuan.

Dead on the spot ang biktimang si Genaro Cañete Jr. alyas Ramon ug "Junior Putol",32, residente sa nahisgutang lugar ug kasamtangang nagtrabaho sa GMJ Reyes Tire Dealer isip tireman.

Sumala pa sa usa ka saksi (ngan gipugngan) duha ka mga wala mailhing mga lalaking luwan sa usa ka motorsiklo nga Aura ang mihunong ug kalit nga mipusil sa biktima makadaghang higayon.

Ang biktima niadtong tungura kasamtangang nagbarog-barog atubangan sa gitrabahuan niini dihang nahitabo ang pagpamusil.

Ang testigo niadtong tungura mikanaog gikan sa iyang balay aron kuhaon ang mga anak nga nagduwa duol sa gibarugan sa biktima dihang naabot ang mga suspek.

Wala pa niya makuha iyang mga anak nanaog ang backrider sa motor nga nagsuot og bullcap dayon miduol sa biktima ug mipusil niini makadaghang higayon bisan dihay mga bata sa duol ug ang testigo.

Human sa pagpusil daling misakay og balik sa motor ang suspek ug nangikyas sa direksyon sa dalan T. Padilla.

Nakaangkon og usa ka samad sa walang aping, ug tulo ka samad sa walang kilid si Cañete. Patay kini diha-diha.

Ang mga sakop sa Scene of the Crime Operation (SOCO-7) nakarekober og upat ka basiyo sa kalibre 45 nga bala, usa ka metal fragment samtang usa ka kutsilyo ang nakuha diha sa posesyon sa nagbuy-od nga biktima.

Si JO1 Catherine Cintos sa Bagong Buhay Rehabilitation Center sa pakighinabi sa Banat News mitug-an nga dunay nasulod nga Genaro Cañete diha sa BBRC tungod sa kasong frustrated murder niadtong Abril 6,1992 apan nadismiss ang kaso ug napagawas kini dayon pagka- Abril 14 sa samang tuig.

Pipila na ka adlaw ang milabay, usa ka tighimo og lapida ang gitumba sa mga suspek nga susama og vigilante ang estilo diha mismo sa iyang gitrabahuan sa kilid sa sam-ang sa Carreta apan nasuta nga walay rekord ang biktima.

Ang kapolisan ug Commission on Human Rights nagduda nga di tanang biktima sa gipatay nga 166 ka biktima binuhatan tanan sa vigilante kundili posibleng gikopya nalang ang estilo aron mapasangil tanan ngadto sa maong grupo.