Modernong CCPO bldg buhion

Modernong edipisyo alang sa Cebu City Police Office nga dugay nang nalubong sa agay-ay hayan matuman na kun buhion og balik ni Mayor Tomas Osmeña ang gisaad niini niadtong unang termino niini pagkamayor sa dakbayan.

Si Regional Intelligence and Investigation Division chief, Senior Supt. Agustus Marquez maoy mihisgot niining dugay nang saad sa mayor atol sa pagbisita kagahapon ni Police Regional Office 7 director Chief Supt. Silverio Alarcio sa CCPO.

Matud pa ni Marquez sa pakighinabi sa mga tigbalita kagahapon nga panahon pa ni police city director Antonio Entera nga mao usab ang unang termino ni Osmeña pagkamayor dihang mipasalig ang naulahi nga gahinan og P25 milyones nga pundo alang sa upat ka andanang modernong edipisyo.

Apan dunay kundisyon si Osmeña kaniadto nga gahinan lang og pundo ang CCPO alang niini kun ang tanang PNP support units diha sa Camp Sotero Cabahug papahawaon ug ang edipisyo hangtud-sa hangtud iya sa CCPO lamang.

Ang Campo Sotero Cabahug mao usab ang gikahimutangan sa CIDG-7, Traffic Management Group-7, Regional Crime Laboratory, PNP hospital ug Dental Services nga di sakop sa CCPO.

Matud pang Marquez sa plano ang bag-ong edipisyo dunay helipad sa ibabaw, underground parking area, indoor firing range ug uban pa.

Alang kang Marquez ang Sugbo isip ikaduhang labing dakong dakbayan sa Pilipinas gawas sa Manila angayang duna usab kini modernong edipisyo sa kapolisan.

Sa pagkakaron dakong pundo sa CCPO ang nagamit alang sa pag-repair sa gibukbok ug giagay-ay na nga mga bungbong sa ilang mga karaang edipisyo nga gitukod panahon pa sa dekada 60 nga diin ang uban gipanindot nalang sa bag-ong pintal.