Pusher namusil sa mga polis

Ang kapolisan sa lungsod sa Barili nga mipahigayon og ronda sa usa ka notadong mamaligyaay og drugas gipamusil sa miaging udto sa Tayong, Barili.

Apan swerte kay walay nasamdan sa habig sa mga polis sa dihang gipusil ang duha sa pito ka mga polis sa balay ni Reykim Bayno, hingkod ang panuigon.

Sa taho nga naabot sa Provincial Police Office nasayran nga ang kapolisan nakadawat og report kabahin sa giingong pagpamaligya sa suspek og shabu, gani anha pa sa ilang balay magsuyop human kini makapalit og shabu.

Ang ronda gihimo ni SPO4 Floro Vergara, SPO3 Andres Alpas, SPO2 Luis Dandan, SPO2 Romulo Flores, PO2 Michael Cortes, PO2 William Beltran, ug PO2 Joselito Sevella.

Matud pa nga pag-abot sa kapolisan, nakit-an nila ang mga grupo sa mga kalalakin-an nga naglumbaanay sa pagdagan ug wala magdugay gipabuthan na sila ni Bayno nga tumong nila ni PO2 Cortes ug Beltran sa wala pa matino nga kalibre sa armas hinungdan nga mibawos og pasalba ang mga polis dungan sa pahibalo nga sila mga polis.

Apan gisigihan sila pagpamusil ni Bayno hinungdan nga nahitabo gayud ang pinusilay. Ang suspek misibat palayo sa maong dapit human nahutdan kini'g bala sa armas nga iyang gigamit.