Coastal clean up sa Sabado

Subling ipahigayon ang halapad nga pagpanglimpyo sa kabaybayunan dinhi sa dakbayan sa Sugbo karung adlaw'ng Sabado isip tipik ug kabahin sa mga pagpangandam paglimpyo sa palibot sa dakbayan alang sa nagsingabot nga Asean summit sa Disyembre.

Si Bise Mayor Michael Rama, tsirman sa Coastal Management Board (CMB) maoy nangulo sa gipahigayong launching clean up drive nga himuon karung tuiga sa mga kabaybayonan sa kinse ka mga urban barangays.

Apan ang maong pagpanglimpyo karung Sabado giulohan kini nga Limpyo Coastal alang kang Jojo, diin ila kining gipahinungod usab ngadto sa gipatay nga aktibong kanhi market administrator ug chairman sa Bantay Dagat Commission nga si Elpidio Jojo dela Victoria Jr.

Matud ni Rama magsugod ang maong kalihukan alas 7 sa buntag diha sa Mabolo paingon na sa Pasil ug Mambaling ug ngadto na sa kabaybayonan sa South Reclamation Project (SRP).

Lakip sa mitambong sa press conference kagahapon ug mipasalig nga moapil sa maong kalihukan mao ang grupo sa Cebu City United Vandors Association, mga NGO's, mga tinun-an sa pribado ug publikong tunghaan, kapolisan ug militar og uban pa.