Apan sentro sa kampanya karon ni Osmeña mao ang pag-ban sa mga minor de edad nga makasulod diha sa mga internet café aron malikay kini sa mga law-ay nga buhat.
Pinaagi niini gituohan sa mayor nga maminusan ang binuang sa cybersex gumikan kay kun dunay mga internet café nga padayong magpasulod og mga minor de edad mibahad si Osmeña nga iyang i-revoke ang business permit niini ug pasirad-an ang maong establisamento.
Giangkon sa mayor atol sa press conference kagahapon sa udto nga dili siya kumbinsido nga ang pagpasar og ordinansa nga mag-ban sa mga internet café pagbutang og mga pribadong lawak ingon man cubicles maoy tubag niining maong problema.
Kini tungod kay maghatag lang unya kini og dugang kauwawan sa gobyerno ilabi na kun sama sa ubang mga ordinansa ug balaod dili gihapon unya kini epektibong mapatuman.
Ang kakulang sa gahin nga miresulta sa kakulang sa mga personnel sa kapolisan maoy nag-unang problema nganong daghan sa mga ordinansa ug balaod sa siyudad wala hingpit nga ma-implementar.
Giplanohan sa mayor nga isalig ngadto kang Tessie Fernandez ang paghimo og mga pagtuon ug pamaagi aron batukan ang cybersex ug naglaraw sab siya nga mopahigayon og konsultasyon ngadto sa Bantay Banay kabahin ning maong isyu.