May red tide sa Siaton, Negros Oriental

Positibo sa red tide toxin ang mga kinhason sa mga kadagatan sa Siaton, Negros Oriental subay sa gihimong pakisusi sa mga tinugyanan sa maong lugar ug sa Bureau of Fisheries and Aquatic Resources (BFAR-7).

Ang officer-in-charge sa BFAR-7, Atty. Benjamen Felipe Tabios Jr. miluwat og pahimangno sa mga molupyo sa nahisgutang lugar nga likayan ang pagkaon o pagpamaligya sa mga kinhason sa maong lugar hangtod nga moluwat og laing direktiba ang hingtungdang ahensya nga magkonpirmar nga luwas nang kan-on ang mga kinhason sa maong dapit.

Hinuon giklaro ni Tabios nga luwas sa red tide ang mga isda sa maong dapit apan gitambagan kini nga siguraduhon lang nga lab-as ug kinuhaan og hasang ug tinai ang mga isda sa maong dapit sa dili pa kini lutoon ug kan-on.

Giluwatan kining maong direktiba sa BFAR-7 alang sa seguridad sa mga molupyo sa maong lugar aron malayo kini sa peligro.

Matud ni Tabios ang paralytic shellfish poisoning (PSP) subay sa mga sampol nga nakuha sa maong lugar niabot kini karun og 3,477 ug STXeq/100 ug nagkinahanglan nga mabalik sa normal nga regulatory level nga 40ugSTXeq/100 una pa madeklarar nga luwas nang kan-on ang mga kinhason sa maong lugar.