Birhang puthaw mipriso ni lola ug apo

Ang birhang puthaw sa pultahan ug bintana maoy nakasanta sa katawhan sa Alegria pagsalbar sa apohan ug apo gikan sa hingpit nga pagkaugdaw sa sunog sa ilang balay sa Sangi, Madridejos, Alegria niadtong Lunes sa kaadlawon.

Matud pa ni Mayor Raul Guisado sa Alegria nga wa makaagi sa pultahan ug bintana ang mga katawhan aron unta bunloton ug makagawas sila si Cerena Bustamante, 48, uban sa iyang apo nga si Paul Ace Bustamante, 6 ka buwan ang edad gikan sa nagsilaob sa kayo nilang balay.

Si Guisado nagkanayon nga dili usab niya mabasol ang biktimang apohan sanglit usa kini ka negosyante busa ang balay usab niya gibutang gyud sa siguro.

Ang pagpanaod og birha sa bintana ug pultahan niini maoy nagsanta sa lakang sa katawhan nga makasulod sa ilang balay aron luwason sila gikan sa pagkaugdaw sa ilang balay.

Miingon si Guisado nga sa atop nalang agi ang katawhan apan dihang nakasulod na kini sa balay, ulahi na ang tanan kay ugdaw na ang mga biktima.

Ang balay ni Bustamante nagsilbing bodega ang silong sa iyang mga baligyang gasolina ug mga LPG ug uban pang mga baligya sa iyang tindahan didto sa merkado sa Alegria.

Nag-inusara pagpuyo ang biktima kay ang iyang bana tua sa Mindanao ug ang iyang mga katabang nga mga tindera, namauli usab sa tagsatagsa ka panimalay niini panahon sa gabii.

Busa alang kang Guisado, nga ang birha sa balay maghatag og kaayohan, apan maghatag usab usahay og dili maayo sa tag-iya sa balay.

Sa laing bahin gibutyag ni Guisado nga nakatabang kaayo og dako ang firecycle sa lungsod nga hinatag sa Kapitolyo dili pa dugay kay mao kini nakasanta sa kayo sa bodega sa biktima.