Drayber sa habalhabal gipusil sa tulisan

Usa ka drayber sa habalhabal uban sa iyang hinigugma gitulis, ug pagkahuman gipusil sa usa sa upat ka wala mailhing tulisan sa cell site sa Pulangyuta, Looc, Danao pasado alas 9 ang takna sa miaging gabii.

Ang biktima kinsa nadangat sa Danao District Hospital mao si Anjon Delantar Pepito, 21, ulitawo ug ang hinigugma niini nga si Madel Pitogo, pulos taga Panangban, Compostela.

Si Pepito samadan sa walang bukton, tuong paa ug sa dughan nga milapos ang bala sa iyang bukobuko.

Base sa gihimong imbestigasyon nasayran nga si Pepito ug Pitogo nanuroy sa naasoy'ng lugar dala ang gimaneho niining habalhabal.

Si SPO1 Lolito Torres Oliverio sa pakighinabi sa Banat News miingon nga samtang ang duha ka biktima hinay nga nagpadagan palibot sa maong lugar kalit lang dunay upat ka wala mailhing tawo, usa sa upat ang mipahunong kanila dayon nanion.

Si SPO1 Lolito Oliverio miingon nga inay ihatag ang gipangayo sa upat, giingong nagdumili si Pepito sa paghatag sa butang, hinungdan nga ang usa sa mga tulisan mipusil kaniya makatulo ka higayon gamit ang wala pa matino nga kalibre sa armas.

Human sa pagpamusil ang upat daling misibat palayo sa lugar samtang ang kapolisan napakyas sa pagsikop ug pag-ila sa mga responsable sa krimen.