Oracion gipasidunggan sa Mandaue City

Hingpit nga gihatag ni Mayor Thadeo Ouano ang cash incentive nga P25,000 ngadto sa labing unang Pilipino nga nakaabot sa pagsaka sa Mt. Everest nga si Heracleo "Leo" Oracion.

Gihimo ni Ouano ang paghatag sa maong kantidad atol usab sa gihimong programa sa ika-108 nga kasaulogan sa Adlaw sa Kaugalingnan kagahapon, Hunyo 12 nga gipahigayon sa atubangan sa Mandaue City Hall.

Ang programa nga gihimo atol sa Adlaw sa Kaugalingnan gitambongan usab sa mga kawani sa City Hall, barangay official ug lumad nga lumolupyo sa maong dakbayan.

Si Bise Mayor Amadeo Seno maoy mibasa sa resolusyon nga gipangamahanan ni Konsehal Allan Borbajo ug Konsehal Jonas Cortes nga nagpahalipay ug nag-ila sa bayanihong gibuhat ni Oracion nga gipasigarbo sa mga Mandauehanon.

Ang maong resolusyon nga gibasa ni Seno nga giuyonan sa tanang sakop sa konseho sa miaging regular session naghatag og pagtugot kang Ouano sa pagpagawas sa P25,000 alang sa cash incentive ni Oracion.

Ang paghatag sa maong cash incentive sa siyudad gisaksihan usab sa mga kauban ni Oracion sa Philippine Expedition Team sa Mt. Everest nga naglakip kang Erwin Emata, mga doktor ug uban pang mga kauban.