Sex toys dili i-release ni Mangaoang

Ang maong pamahayag maoy reaction ni Mangaoang dihang ang mga "vibrators" nga de bateriya nga gisakmit sa iyang mga tawo, buot na untang bawion sa tag-iya niini.

Matud pa ni Mangaoang nga gihimong pangatarungan sa claimant nga wala niya hinganli nga misugot na ang Department of Finance (DOF) nga ikahatag na ngadto sa tag-iya ang maong kargamento nga "sex toys".

Ang maong mga vibrators nga makamugna'g gamhanang gana sa mogamit niini dili angayang isipon lang nga usa ka duwaan sumala sa tigpaniid diha sa Bureau of Customs (BOC).

Giisip gihapon kining sagrado gumikan sa talagsaong gahum nga idulot niini ngadto sa mogamit bisan bateriya lang ang mopalihok niini.

Si Mangaoang sa iyang bahin mipasabot nga kining vibrators maghatag og law-ay ug imoral nga epikto ngadto sa sosyidad busa giisip kining ilegal.

Busa alang kaniya bisan kun may pagtugot pa ang DOF nga ika-release kini gikan sa BOC, dili gihapon siya mosugot kay gidili ang importasyon niini sumala sa balaod.

Alang kang Mangaoang nga bisan kun gipaganyar kinig maayo sa mga tindahan dinhi sa dakbayan sa Sugbo, sa higayong may tawong magbitbit niini aron ibaligya, dakpon gihapon ang maong tawo ug sakmiton ang maong butang.