Cyberporn girls namahayag vs. Woolbright

Mga babayeng naabtang naghubo diha sa usa ka cyberporn den sa dakbayan sa Lapu-Lapu miluwat na og pamahayag batok sa ilang agalong Amerikano nga si Marc Anthony Woolbright.

Ang Criminal Investigation and Detection Group 7 chief nga si Sr.Supt. Jorge Corpuz mitug-an sa mga tigbalita kagahapon nga ipasaka na karon ang kaso batok kang Woolbright kinsa nakapiyansa niadtong Sabado bisan wala pay kasong nasang-at.

"We were able to enlighten them that we need their cooperation para di na mabiktima pa ang ubang mga Pilipina," sumala pang Corpuz.

Ang mga babayeng nadakpang naghubo sulod sa lawak atubangan sa webcam nga konektado sa internet nagkanayon nga girekrut sila ni Beth Bacus ang giingong uyab ni Woolbright bugti sa kwartang ilang madawat kun maghubo sila sa atubangan sa webcam.

Sumala pang Corpuz nga pinaagi sa bank accounts ni Woolbright masulod ang bayad sa mga kliyenteng buot nga makatan-aw ug si Bacus usab ang nagdumala niini kun wala diha si Woolbright.

Apan si Bacus sa pakighinabi sa Banat News mihimakak sa pasangil ug miingong mga higala ra niya ang maong mga babaye ug ilang kabubut-on ang ilang gibuhat. Nangangkon si Bacus nga susama ra sa ordinaryong internet café ang ilang gi-operate, apan dihang gipangutana sa Banat News kung nganong sa pribadong lawak kini gibutang ug may higdaanan wala na siya motubag ug nagkanayon nga di na siya mokomentaryo.

Samtang si Corpuz nagkanayon nga dunay pamahayag si Bacus kanila nga si Woolbright gyud ang nagsugod sa maong negosyo nga sumala pa ni Corpuz dako ang kwartang kitaon.

Ang korte na maoy pabut-on sa kasong isang-at batok sa duha ug kun makatabang ba ang pamahayag ni Bacus aron siya maluwas sa kasong kriminal.

Nagtuo si Corpuz nga ma-absorb sa kasong kalapasan sa R.A. 9208 kun Anti-Trafficking in Person ang kasong paghupot og armas nga walay lisensya ni Woolbright ingon man ang kabahin sa mga drug paraphernalia nga nakuha sa maong operasyon.