Ang mga biktima nga giingong mao lay nahabilin sa ilang pinuy-anan ug nangatulog pa atol sa pagtumaw sa sunog naila nga si Cerena Bustamante, gibanabanang 50 anyos ug ang apo niini nga si Paul Ace Bustamante, pito pa lang ka bulan.
Matud sa utility worker sa Alegria Municipal Hall nga si Demmy Fuentes dihang nahinabi sa Banat News nadawat sa kabomberohan sa maong lungsod ang alarma sa sunog alas 2:30 sa kaadlawon apan milanat og 30 minutos una pa hingpit nakontrolar ang kalayo.
Gibutyag ni Fuentes nga walay firetrucks ang ilang lungsod ug bugtong ang firecycle lang nga hinatag sa kapitolyo ang gigamit sa pag-responde.
Ang mga miresponding sakop sa kabomberohan gikan sa mga silingang lungsod sa Badian ug Malabuyoc mao nay hingpit nga nakakontrolar sa kalayo hinungdan nga wala kini makatapon sa mga silingang panimalay.
Matud ni PO2 Walter Macasling sa Badian Police Station dihang nahinabi sa Banat News sa telepono gibanabana sa P100 mil ang danyos sa naabo nga pinuy-anan nga gipanag-iya sa pamilyang Bustamante.
Padayon pang giimbistigar ang posibleng hinungdan sa maong sunog ug usa sa anggulo nga gitutokan mao ang electrical short circuit.