Armas sa police woman aksidenteng mibuto drayber 'igo

Armas sa usa ka policewoman aksidenteng mibuto ug nakaigo sa PUJ drayber nga iyang gisakyan samtang nagtadlas diha sa dalan Katipunan, Tisa ning dakbayan kagahapon sa buntag.

Samdan sa duha ka bitiis si Christopher Escolar,32, minyo nagmaneho sa rotang Labangon human kini aksidenteng naigo sa mibutong armas ni PO3 Racquel Camay, sakop sa Cebu City Police Office ug nadestino sa Patrol 117.

Sumala pa sa imbestigasyon sa Homicide Section diha naglingkod si Camay sa front seat tupad ni Escolar ug ang armas niini nga kalibre 45 pistola diha sulod sa iyang bag.

Samtang nagdagan ang PUJ mipaka ang buto sa armas diha sa sulod sa bag ni Camay ug diha niping-it si Escolar gumikan sa pagkaigo niini.

Daling gidala ni Camay sa Cebu City Medical Center si Escolar ug luwas na ang kahimtang.

Gipaabot nalang sa Homicide Section kung dunay kasong ipasaka ang biktima sa maong polis apan gipaabot nga dunay kasong administratiba nga atubangon si Camay gumikan sa insidente. Si Camay kanhi sakop sa Homicide Section una pa kini madestino sa Patrol 117.