Illegal recruiter dakpan: Mga biktimang babaye gipasayaw sa bar

Illegal recruiter nailad sa tulo ka babaye nga iyang gi-recruit hinungdan nga nagtingkagol kini sa prisohan.

Gipasakaan og kasong qualified human trafficking niadtong Miyerkules si Charlene Barro, 27-anyos taga lungsod sa Medellin diha sa Regional Trial Court branch 61 sa Bogo.

Si Barro nasikop sa mga opisyal sa San Isidro, Talisay ug gitugyan sa kapolisan tungod kay gidala kini sa iyang mga nabiktima diha sa maong lugar.

Ang tulo ka biktima ni Barro giila nga si Madelyn Goliwas, 23, ug ang magsuong minor de edad nga si Janet ug Gina (ngalan gipugngan) pulos nagpuyo sa Medellin.

Si PO3 Margienette Yosores sa Woman's Desk Officer sa kapolisan sa Talisay sa pakighinabi niini sa Banat News kagahapon nagkanayon nga ang mga biktima gipasaligan ni Barro nga pasudlon og trabaho isip mga waitress sa restaurant ug makadawat og P3,000 nga suweldo matag buwan ang usa kanila, lain pa ang P100 nga allowance matag adlaw ug libre nga pagkaon.

Tungod sa tinguha nga makatrabaho, niadtong Mayo 31 mikuyog ang tulo ni Barro ug gidala sila diha sa Mandaue.

Apan paghiabot nila diha sa lugar dili isip silbidora sa usa ka restaurant ang ilang trabaho tungod kay gipasayaw sila sa bar nga naila nilang Sunrise Angel's Bar.

Pagkasunod adlaw gidala ni Barro ang tulo sa Bacolod ug gipasayaw na usab kini sa Diamond Angels Bar ug Golden Angels Bar.

Matud ni Yosores nga ang mga biktima mireklamo tungod kay pahuboon sila nga magsayaw atubangan sa mga kustomer.

Gikan sa Bacolod gidala ni Barro ang tulo ka biktima balik unta sa Medellin misakay sila og sakyanan paingon sa San Carlos dayon sa dakbayan sa Toledo ug balik na unta sa Medellin.

Apan paghiabot diha sa Toledo misakay og taxi ang mga biktima og gikuyogan gihapon kini ni Barro.

Ang mga biktima mihangyo sa drayber sa taxi nga magpahatod sa San Isidro Talisay tungod kay si Janet ug Gina adunay apohan sa maong lugar.

Walay kalibutan si Barro nga ang tuyo sa tulo mao ang pagpangayo og tabang.

Pag-abot diha sa San Isidro ang magsuong minor de edad misumbong sa ilang apohan sa nahitabo kanila.

Ang apohan sa duha nangayo og tabang sa mga opisyal sa nahisgutang barangay hinungdan nga nasikop si Barro.

Si Yosores midungag nga si Barro kanhi dancer usab sa nahisgutang night club sa Bacolod ug nahunong na kini sa iyang pagkamananayaw tungod kay aduna na kini tulo ka anak ug gikatahapan nga siya maoy sugoon og pagpangita og mga bag-ong dancers sa night club nga gitrabahoan niini.