Gipusil tungod kay nanukmat sa tag-iya sa iro nga namaak

Gipusil sa silingan ang usa ka tawo kinsa gikalalis human ang usa ka babaye napaakan sa sa iro sa ilang silingan niadtong miaging gabii sa Maguikay, Mandaue.

Ang biktima mao si Eric Rosal, 35 anyos, minyo nga nagpuyo sa maong lugar.

Ang suspetsado nga nakapusil sa biktima mao si Rey Orlanes, hingkod ang panuigon ug silingan niini sa maong dapit.

Si SPO3 Areston Bataluna sa Casuntingan Police Station miingon nga napaakan sa iro ang iyaan sa biktima.

Matud pa ni Bataluna nga sa pagkanaug sa biktima sa traysikad maoy nasiklapan ang silingan niini nga nailhan lang si Beroy nga gituohang maoy tag-iya sa iro nga nakapaak kinsa kuyog sa suspetsado.

Gitawag kini sa biktima ug gisukmatan sa nahitabo sa iyang iyaan nga napaakan sa iro. Mihimakak kini nga maoy tag-iya hangtod nga kalit lang nga namusil ang suspetsado.

Dali nga gidala ang biktima sa Vicente Sotto Memorial Medical Center sa dakbayan sa Sugbo ug giatiman kini sa mga doktor.