NPA gitagalan 6 ka bulan

Gipahibaw sa Commanding Officer sa 19th Infantry Battalion Col. Loue Dagoy nga iyang gitagalan ang mga sakop sa Communist Party of the Philippines,New Peoples Army (CPPA-NPA) nga puhagon niya sulod sa unom ka buwan ngadto sa usa ka tuig.

Gihulagway ni Col. Dagoy ang intero 3rd. district sa lalawigan sa Leyte,nga nahisakop sa iyang hurisdiksyon labi na didto sa San Isidro nga adunay daghan mga tawo nga nagpasakop sa walhong pundok.

Mao kini ang gibutyag ni Dagoy atol sa interview sa usa sa mga sibyaanan dinhi sa Sugbo sa miaging gabii.

"Ako ning klarohon, mismo gikan nako unom kabulan ngadto sa usa ka tuig, mao ni akong time frame nga akong ihatag nilang tagal" sumala pa ni Dagoy.

Usa kini sa kampanya karon sa gobiyerno sa Anti Insurgency Campaign nga gilusad batok niadtong mga sakop sa walhong pundok.

Sumala pa ni Dagoy nga amdam na ang ilang mga plano sa ilang operasyon sa dili pa niya sugdan ug ingon man gisuportahan usab siya sa lokal nga kagamhanan ug sa kagamhanang nasyonal.

Matud ni Dagoy nga nakuha na nila ang simpatiya sa mga lumolupyo, base sa ilang gipakita sa ilang trabaho, gani karong umaabot petsa 13 niining bulana, liwas sa Independence Day, adunay dakong pulong-pulong sa mga lomulopyo nga ilang pagahimuon sa Barangay San Isidro diha sa Municipal Hall kay matud pa naa nagbase ang Committee Section 3 sa walhong pundok.

Gihulagway ni Col. Dagoy nga maoy dakong mass base ang San Isidro.

"Ingon ana ka sekreto akong mass base diha, human sa pulong-pulong naa koy surpresa nila nga nakaila kaayo nila," dugang asoy niya.

Sa pangutana atol unya sa pulong-pulong basin adunay moatake, matod niya nga "aduna koy counter measure nga himoon.''

Midugang si Dagoy nga nagkasabot ang kagamhanang lokal nga suportahan ang maong kalihukan.

Gitagaan ni Dagoy ang mga walhong pundok sa duha ka pamaagi nga mosurender nalang aron sila makabalik sa sosyodad o ba kaha mahawa sa ilang grupo.