LOLO NAAPIL OG KASUNOG

Usa ka 63, anyos nga lolo naapil pagkasunog ug namatay human ang iyang panimalay gilamoy sa kalayo sa miaging adlaw alas 10:30 sa buntag sa Sitio Cansumat-ang, Lunog, bukirang bahin sa Boljoon mga onse ka kilometros gikan sa Poblacion.

Nakadawat og report ang kapolisan nianang ala una na sa hapon human mipahibalo kanila ang hepe sa tanod sa maong barangay nga si Alfredo "Andoy" Vibas.

Ang namatay giila nga si Rogelio Nebla, minyo, giingon adunay sakit nga rayoma sulod sa pipila ka bulan. Gani maglisud kini sa pagtindog ug maglisod usab sa paglakaw nga kanunay na lang magpuyo sa ilang panimalay nga luya ang panglawas, sumala pa ni SPO4 Cristino Uraca sa Boljoon sa pakighinabi sa Banat News kagahapon.

Matud pa ni SPO4 Uraca nga sa wala pa mahitabo ang sunog, ang asawa niini nga si Maria giingong wala diha sa ilang balay kay didto sa silingan ug ang biktima siya ra usa.

Gibutyag ni SPO4 Uraca nga naghaling sa kusina ang biktima alang sa ilang pamahaw gamit ang sugnod nga kahoy, apan wala kini makabantay nga sa kalit lang midako ang siga sa kalayo didto sa kusina nga maoy nakaingon sa pagkuyanap niini.

Nagtuo ang kapolisan nga posibleng nahulog ang kahoy nga gisugnod sa biktima ug dali usab kaayong miulbo kay light materials man ang balay niini.

Matud ni SPO4 Uraca nga natanggong ang biktima sa sulod ug wala kini makagawas atol sa pag-ulbo sa kalayo.