Magtiayong "pusher" ug "idlas" nga pusher nangadakpan sa MCPO

Magtiayon nga nalambigit sa pagpayuhot og ginadiling drugas pasakaan na og kaso human kini masikop didto sa Avansenia St. Tribunal, Centro Mandaue sa milabay'ng kadlawon.

Matud pa ni PO2 Bruce Gairanod sa Vice Control Section sa kapolisan sa Mandaue nga human nila makuha ang resulta sa mga ibedinsiya ngadto sa PNP crime laboratory ila nang ipasaka ang kasong kalapasan sa RA 9165 batok sa magtiayon nga si Noel ug Maria Gracia Batulan, mga legal ang panuigon ug nagpuyo sa Tribunal, Centro dakbayan sa Mandaue.

Kahinumduman nga ang magtiayong Batulan nasikop sa mga sakop sa Vice control section atol sa gipahigayong buybust operation sa milabay'ng kaadlawon.

Nakuhaan ang magtiayon ug duha ka bultong gituhuang shabu, usa ka gamay'ng pakete sa shabu, buybust money nga mokantidad og 500 ka pesos, cellphone ug ang 15 mil ka pesos nga gituohang halin sa pagpamaligya og illegal nga drugas.

Samtang usa ka gihulagway nga idlas nga pusher nga si Dennis Jenjaquet alyas Siongo ang nadakpan sa grupo ni Insp. Leoncio Baliguat Jr. diha sa dalan San Antonio, Looc Mandaue.

SiJenjaquet gironda sa kapolisan sa milabay'ng bulan apan nakaikyas kini. - Bong Soriano uban sa taho ni Romeo T. Limpangog Moli-moli, VK nasakmit

Mga video karera ug moli-moli ang nasakmit sa duha ka managlahing operasyon nga gilusad sa Criminal Investigation and Detection Group ug Criminal Investigation and Intelligence Branch kagahapon ug sa miaging adlaw nga miresulta sa pagkasakmit sa 18 ka mga makina.

Ang grupo ni Supt. Pablo Labra nakasakmit og walo ka mga moli-moli gikan sa barangay Calamba kagahapon lakip na ang duha ka magsuong caretakers nga unang milimod nga duna silay makina sa sugal.

Ang gipangdakop giilang sila si Rolando Tejares ug Jo Tejares nga sumala pa sa report milimod nga dunay makina diha sa ilang balay apan nasigpatan sa mga polis maong gikuha kini ug gidakop ang duha og apil.

Ang mga moli-moli gi-turn-over na ngadto sa Cebu City hall alang sa gikatakdang pagpangguba niini.

Samtang sa laing operasyon, ang CIDG 7 milusad usab og pagpangronda diha sa sudlunong bahin sa dalan Belgium sa Pasil ning dakbayan niadtong Miyerkules sa hapon.

Nakuha sa maong operasyon nga pinanguluhan ni Sr. Inspector Fermin Armendares ang walo ka mga moli-moli ug duha ka video karera apan walay mga tawong nadakpan sanglit gipamiyaan ra ang maong mga makina.

Upat sa mga makina ang gipangunayan og surender kanila sa mga residente sumala pang Armendares sa kahadlok nga madamay sa pagdakop.