209 ektarya giandam

Gipaspasan ang paghinlo sa 209 ektaryang luna sa lungsod sa Consolacion nga tarukan sa Cebu Provincial Police Office headquarters, ug ang buhatang rehiyonal sa Department of Environment and Natural Resources (DENR).

Matud pa ni Consolacion municipal administrator Gerson Maranio nga adlaw ug gabii ang trabaho sa mga buldozer, grader ug tanang mga dagkong ekipo sa lungsod aron hingpit nga malimpyo ang maong luna.

Nahimutang sa barangay Nangka, Consolacion, ang edipisyo usab sa lungsod o municipal hall, anha na itarok sa maong dapit.

Matud pa ni Maranio nga daghan pang dagkong buhatan sa nasudnong kagamhanan nga nagplano nga anha motukod sa ilang mga rehiyonal o probinsiyal nga buhatan.

Ang maong lungsod may gilay-ong 30 kilometros gikan sa dakbayan sa Sugbo nga gisakpan sa 21 ka mga barangay.

Alang kang Maranio wala nay suliran ang mga molupyo sa kabukiran sa maong lungsod tungod kay kompleto kini karsada, suga, ug tubig.

Mibutyag usab si Maranio nga kusog kaayo ang paglambo sa ekonomiya sa Consolacion karong panahona.