Kanhi gobernador Pablo Garcia: Sugbuak "patay" na

Sugbuak posibleng dili na matuki sa Kongreso ug dili na mapadayon ang bill niini tungod kay ang tanang pending bill mawagtangan og bili inig matapos na ang congress.

Matud ni Pablo Garcia kanhi gobernador sa probinsiya sa Sugbo nga posibleng mapatay na ang bill sa Sugbuak.

Ang kongreso mo-adjourn karong Hunyo 9 ug mobalik kini sa Hulyo 25 hangtud sa Disyembre niining tuiga ug dili mahatagan sa pagtagad ang bill sa Sugbuak kung iduso na usab ang impeachment ni Presidente Gloria Macapagal Arroyo.

Inig ka Enero sa sunod tuig wala nay mapahigayong meeting ang Kongreso tungod kay filing of certificate of candidacy na man kini para sa 2007 nga eleksiyon.

"So with the end of this Congress tanang pending bills ma wala na, so huwat na pod og naay laing bill" matud ni Garcia.

Sa laing bahin, sa milabay'ng adlaw ang konseho sa dakbayan sa Sugbo miawhag ni Kongresista Emilio Macias II kinsa maoy tsirman sa committee on local government sa House nga anhi sa Sugbo ipahigayon ang public hearing sa tulo ka bills kabahin sa pagbuak-buak sa Sugbo ngadto sa tulo ka probinsiya.

Apan ang maong hangyo wala pamatia ni Macias.

Si Konsehal Edgardo Labella sa Sugbo nagkanayon nga angayang anhi ipahigayon sa Sugbo ang public hearing sa maong mga bill para mabati ang mga sentimento sa mga Sugboanon.

Matud ni Labella nga dili makiangayon ang gibuhat ni Macias sa wala pagdapit niini sa mga Cebuano para motambong sa pagtuki sa mga bills.