Walay ikabayad nasangpot sa dunggab

Duha ka tawo nga nag-inom nga walay kuwartang ikabayad sa ilang gi-order nga ilimnon ang nagkalalis ug misangko gayod sa pagpanunggab.

Nahitabo kini alas 7 pasado ang takna sa miaging gabii sa Sudlon, Maguikay, siyudad sa Mandaue.

Ang biktima mao si Aldrick Tabanao, 31 anyos, minyo ug ang silingan nga si Reynante Yarte, 29 anyos, minyo mao usab ang suspetsado nga nakadunggab niini.

Si SPO3 Areston Bataluna sa Presinto 3 nga gikahinabi sa Banat News nagkanayon nga human nilang mag-inom nahibaw -an nilang wala silay mga kuwarta hinungdan nga ang cellphone na lamang sa biktima ang gihimong garantiya.

Nagdako ang panaglalis sa managsilingan ug nagkasinumbagay hangtod nga ang suspetsado nga nakakuha og kutsilyo kalit nga gidunggab ang tiyan sa biktima ug uban pang bahin sa iyang kalawasan.

Gidala ang biktima sa Mandaue City Hospital ug gibalhin kini sa Vicente Sotto Memorial Medical Center sa dakbayan sa Sugbo.