5 anyos nalumos, nabuhi

Singko anyos nga batang babaye nga nalumos samtang nangaligo sa dagat sa Looc, Mandaue giingong nabuhi human kini matabang sa mga mananambal sa Mandaue District Hospital kagahapon sa udto.

Hangtod ning pagbalita wala pa hisayri ang ngalan sa maong bata gumikan kay walay tagtungod nga mipakita ngadto sa tambalanan.

Base sa pamahayag ni Elizabeth More, usa sa nakasaksi sa maong panghitabo, nga daw wala nay kinabuhi nga ilang gidala sa hospital ang bata human kini nila makit-i nga nalumos didto sa Sitio Bohol-bohol, Looc mga alas 11 sa udto kagahapon.

Matud pa ni More nga dako ang ilang kahibulong nga pipila ka gutlo sa pagtabang sa maong bata naglihok ug naghangos kini sa kakapoy gumikan sa pagkalumos niini.

Giisip ni More nga usa ka dakong milagro ang nahitabo sa maong 5-anyos nga batang babaye apan walay nakaila sa maong bata.

Matud pa ni PO2 Vicente Gela sa Station 5 sa Mandaue City Police Office nga hangtod alas 4 kagahapon sa hapon wala pa gihapoy mipakitang tagtungod sa maong bata nga anaa pa gihapon sa emergency room sa MDH.

Hangtod ning pagsuwat sa balita nagpaabot pa gihapon ang tagdumala sa MDH nga makuha ang maong bata sa iyang mga ginikanan.