CAV suporta sa vigilante

Dayag nga namahayag si Crusade Against Violence national vice president Thelma Chiong nga dako ang ilang pagsuporta sa mga vigilante dinhi sa Sugbo.

Sa pakighinabi sa Banat News kaniya kagahapon miangkon kining kaniadto pa gisuportahan na sa ilang grupo ang kalihukan sa vigilante apan kutob ra sa "moral support" aron mahurot ang tanang mga badlungon sa katilingban.

Miangkon siya nga wala siya'y nailhan bisan usa ka miyembro sa maong grupo, apan dako ang iyang pagtuo nga dili tanang gipamatay nga susama sa estilo sa vigilante killings mga badlungon gyud sanglit matud pa niya posibleng ang uban dunay mga personal nga kaaway.

Si Chiong maoy inahan sa magsuong sila si Marijoy ug Jaqueline Chiong nga gisignit niadtong Hulyo tuig 1997, ang patay'ng lawas ni Marijoy napalgan ilawom sa bung-aw sa Tan-awan lungsod sa Carcar samtang hangtud karon wala pa igkita ang lawas sa igsuon niini.

Si anhing Judge Martin Ocampo mihukom sa pito ka mga suspek nga sila si Francisco Juan 'Paco' Larrañaga, Josman Aznar, Rowen Adlawan, Alverto Caño, Ariel Balansag ug magsuong sila si James Andrew ug James Anthony Uy nga mabilanggo sa tibuok kinabuhi.

Ang maong kaso miabot sa Korte Suprema diin ang hukom sa magsuong Uy gipaubsan gumikan kay mga menor pa sila dihang nahimo ang krimen, samtang silot kamatayon ang sa nahibiling lima.

Alang kang Cebu Archbishop Ricardo Cardinal Vidal sa mga unang pamahayag nga ang bisan unsang paagi kung pagpatay na og tawo ang hisgutan dili makatarunganon ug dakong supak sa Diyos.