Naghikog tungod sa pulmonya

Tungod sa sakit nga pulmonya, usa ka carwasher naghikog ug namatay sa miaging adlaw sulod sa ilang panimalay sa dalan Gil Garcia, Capitol Site ning dakbayan sa Sugbo.

Ang nagpakamatay naila nga si Oniel Apostol, 25, nga nagpuyo sa naasoy'ng dapit.

Si Leonza Apostol, bayaw sa naghikog, mitug-an sa kapolisan nga paingon na unta mogawas sa ilang balay, nakit-an niya si Oniel nga nagbitay ug wala nay kinabuhi.

Ang inahan nga si Femia Apostol miingon nga dugay nang nag-antos ang iyang anak sa sakit nga pulmonya.

Dako ang iyang pagtuo nga wala na makaantos ang iyang anak hinungdan sa iyang paghikog.

Ang patay'ng lawas ni Apostol anaa karon gipadala sa St. Peter's Funeral Homes aron sa pag-autopsy niini.