Ang kompaniyang nabiktima mao ang Mactan WACO Press Inc. nga girepresentahan ni Orlando Adarne, empleyado sa maong kompaniya.
Matud pa ni Adarne nga nahibulong sila nga sa pagbukas sa ilang buhatan ug motrabaho na unta nawagtang ang ilang roller cylinder, motor machine ug tulo ka mga ligid diin gibanabana nga mokabat sa dul-an P50 mil.
Matud pa ni Adarne ngadto sa Theft and Robbery Section sa kapolisan sa dakbayan sa Lapu-Lapu nga wala silay laing gidudahan kun dili ang ilang security guard nga si Joel Jaspe, 29, nga nagpuyo sa Looc, Mandaue ug sakop sa K and S Security Agency ug ang ilang empleyado nga si Erwin Manturillas, 25, nagpuyo sa Sitio Matumbo, Pusok, Lapu-Lapu.
Si SPO1 Rodito Viovicente, ang OIC Chief sa TRS sa Lapu-Lapu mihimo dayon ug pagpaniid sa dapit ni Jaspe ug ilang nakonpirmar nga gibaligya sa duha ang maong mga makina ngadto kang Ignacio Malinao didto sa dalan Albaño, Subangdaku, Mandaue.
Gumikan niini, ila kining gironda ug nasikop si Jaspe sa iyang panimalay sa Looc, Mandaue.
Mitug-an si Jaspe nga lakip si Manturillas sa maong kaso hinungdan nga kini gisikop usab ug natanggong karon sa Lapu-Lapu police detention cell.
Sa pagkakaron giandam na ang kaso batok ni Jaspe ug Manturillas nga nagkakunsabo sa pagkawat sa kabtangan sa ilang gitrabahoan.