Maguikay grade boys apil na sa Crips ug Bloods gang

Gikonpirmar sa prinsipal sa Maguikay Elementary School sa Mandaue nga adunay nga tinun-an sa grade 2, 3 ug 4 nga sakop sa nagribal nga grupong Crips ug Bloods sa maong tunghaan.

Matud pa ni Cecilia Entera, prinsipal sa Maguikay Elementary School nga ilang namatikdan ang maong mga bata sa dihang hinapos na ang klase niadtong bulan sa Marso ning tuiga.

Gumikan niini, iyang gipatawag ang mga ginikanan sa maong mga tinun-an, apan wala kini moatubang kaniya gumikan sa kahadlok.

Matud pa ni Entera nga hugot nga mihimakak ang mga bata nga anaa sa iyang listahan nga sakop sila sa maong grupo .

Sumala pa sa mga tinun-an nga igo lamang nilang gisuon ang mga tatoo ug hand-signal sa maong grupo.

Apan bisan pa niini, hugot gihapon ang pagmonitor karon ni Entera sa maong mga bata nga nalambigit niini.

Subay niini, iyang gihangyo ang mga magtutudlo sa Maguikay Elementary school nga magmabinantayon sa mga kalihukan sa ilang mga tinun-an gumikan kay sila ang gisaligan sa mga ginikanan nga mamahimong magmalampuson sa ilang pagtungha, isip ikaduhang ginikanan.

Kahinumduman nga atol sa gihimong Barangay Kapuso niadtong Sabado gibutyag ni Maguikay Barangay Captain Elson Dabon nga dunay mga tinun-an sa grade 2, 3 ug 4 nga sayo kaayo misulod sa grupong Crips ug Bloods ug nahadlok kini nga kun dili kini mapakgang sa mga kadagkuan sa tunghaan hayan motumaw ang kagubot sa maong tunghaan.