Mandaue andam na kang Leo Oracion

Hingpit na nga nakapangandam ang kagamhanan sa dakbayan sa Mandaue sa pagpauli ni Leo Oracion nga maoy giilang labing unang Pilipino nga nakasaka sa labing taas nga bukid sa kalibutan nga Mt Everest.

Si Mandaue City Councilor Allan Borbajo nga maoy gitahasan ni Mayor Thadeo Ouano sa maong pagpangandam maoy mipadayag nga nalakip sa ilang gihimong pagpangandam mao ang iyang pagpalabang og resolusyon nga naghatag og pagtugot kang Ouano nga motunol og cash incentive nga P25,000.

Si Borbajo miingon nga bisan kun wala pa ikatakda ang adlaw sa pagpauli ni Oracion sa dakbayan apan nahan-ay na nila ang himuong mga kalihukan.

Naglakip sa gihan-ay nga kalihukan mao ang pagsugat sa mga opisyal sa dakbayan nga gipangulohan ni Ouano ug kuyog usab ang banda sa pagsugat sa tugpahanan.

Dugang pa ni Borbajo nga gikan sa tugpahanan sa Mactan Cebu International Airport (MCIA) himuon usab ang motorkada uban ni Oracion.

Human sa parada isunod ang pagbisita ni Oracion sa buhatan ni Ouano sa City Hall ug ingon man ang pagtunol sa cash incentive isip pag-ila sa garbo sa gihatag niini sa dakbayan.