Duha babaye gitulis sa sulod sa PUJ

Bisan sa mga sunod-sunod operasyon sa mga gituuhang vigilante sa pagpatay sa mga "badlungon" sa katilingban sagad dunay rekord sa mga bilanggoan dinhi sa Sugbu wala gihapoy puas ang mga insidente sa pagpanulis ug pagpanglabni dinhi sa dakbayan.

Kagahapon sa kaadlawon duha ka mga babayeng pasahero sa usa ka PUJ ang nabiktima sa tulo ka mga batan-ong tulisan diin gihimulbolan ang mga biktima sa ilang mga gamit samtang nagtadlas eskina sa mga dalan Boromeo ug Climaco barangay Ermita ning dakbayan.

Midangop sa Carbon Police station sila si Aileen Ungria, 25, ug Ana Liezel Sucayri,29, managhigalang pulos molupyo sa dalan P.del Rosario extension, Sambag Uno ning dakbayan.

Ang duha luwan sa usa ka PUJ padulong na unta pauli dihang ang tulo ka mga wala mailhing mga lalaking pasahero kalit nga mition kanila og mahait nga hinagiban dayong deklarar og tulis.

Gikuha sa mga suspek ang duha ka bag sa mga biktima nga may sulod nga 3550 cellphone nagkantidad og P5,000 ug P3315 nga nagkantidad og P5,000 , cash nga P500 ug usa ka bracelet nga nagkantidad og P1,000.

Ang mga suspek daling nanganaog diha sa dalan Sancianko ug wala na mabagati sa mga mirespondeng polis.