Toledo andam na pagbukas sa Atlas, P100M buhis ok na

Gipangandaman na sa kagamhanan sa Toledo City ang pagbangon sa Atlas Consolidated Mining and Development Corporation (ACMDC) diin sugdan na usab ang pamatigayon sa pagmina og "copper" karong sunod tuig.

Matud pa ni Toledo City Administrator Felomino Plaza nga nakabayad na ang tag-iya sa ACMDC sa P100 milyones nga buhis ngadto sa kagamhanan sa Toledo.

Ubos sa compromise agreement, P10 milyones sa maong buhis, bayran nga cash, samtang ang balig P90 milyones niini, mga yuta na nga iya sa kompaniya.

Matud pa ni Plaza nga bahin sa yuta, naimpas na usab kini dihang gitahan sa kompaniya ang ilang 6 ektaryas nga yuta sa barangay Ilihan, 20 ektaryas sa barangay Cambang-og, ug 5 ka ektarya sa barangay Magdugo nga ang tanan mobalor og P90 milyones.

Nasayran gikan kang Plaza nga si Mayor Arlene Zambo ug si magpapatigayon Alfredo Ramos, usa sa mga tag-iya sa ACMDC nagkatagbo na niadtong miaging semana.

Human malimpyo ang tanang obligasyon sa ACMDC ilabi na sa iyang buhisanan sa gobiyerno, gipasalig niini nga may gigahin na usab silang salapi alang sa pagsugod nila sa ilang operasyon karong sunod tuig.

Matud pa ni Plaza nga gikalipay kaayo og dako sa mga molupyo sa dakbayan sa Toledo ilabi na ang taga barangay Lotupan diin anaa mahimutang ang mina.

Kini tungod kay sa dili madugay mobalik na usab ang kaaligre sa maong lugar ug mokusog na usab ang dagan sa pamatigayon niini.

Miingon si Plaza nga kon naglihok ang Toledo bisan walay operasyon ang ACMDC sukad sa 1994, sa pagkakaron labi kining molambo kon ablihan na pag-usab ang maong mina.