Si Jesus Apolinario alias "Jessie" nasakmitan og 1.12 gramos nga shabu niadtong Agusto 10, 2004 sa alas 4:30 sa kaadlawon diha sa dalan A. Lopez Sityo Mahayhay Barangay Calamba niining dakbayan sa gipahigayong buy-bust operation sa mga polis diha sa balay ni Apolinario.
Ang sala ni RTC Branch 58 Judge Gabriel Ingles wala mohatag og gibug-aton sa depensa ni Apolinario sa paghimakak niini sa mga pasangil batok kaniya.
Ang depensa napakyas sa pagmatuod nga ang mga polis nga misikop ni Apolinario nakabuhat og kalapasan tungod kay misikop kini sa akusado nga walay dalang warrant of arrest.
Matud sa korte nga legal ang pagdakop sa mga polis ni Apolinario bisan og wala silay dalang warrant of arrest tungod kay ang gipahigayong pagpangronda diha sa balay sa akusado ubos sa standard operating procedure ug ang pagsikop gihimo dihang nakuhaan kini sa maong ebidensiya.
Sa kasong kalapasan sa section 5 article II sa Akta Republika 9165, si Apolinario gisentensiyahan sa pagkabilanggo sa tibuok niyang kinabuhi ug pabayron og P500,000.00 nga multa.
Samtang sa paglapas sa section 11 article II sa Akta Republika 9165, si Apolinario gisentensiyahan sa pagkapriso gikan sa 12 ka tuig ug usa ka adlaw ngadto sa 15 ka tuig ug pabayaron og P3,000.00 nga multa.