Gayotin gipangutana bahin sa vigilante

Gipatawag kagahapon sa bag-ong hepe sa Police Regional Office 7 ang hepe sa kapolisan sa dakbayan sa Sugbu aron patubagon kabahin sa "sitwasyon" sa kahapsay ug kalinaw sa dakbayan lakip na ang 162 na ka mga biktima sa pagpamatay sa mga ex-convict nga gituuhang binuhatan sa mga vigilante.

Si Chief Supt. Silverio Alarcio gibisita ni Supt. Melvin Gayotin kagahapon diin ang hepe sa Cebu City Police Office gipangutana kung unsay dagan sa imbestigasyon sa kaso sa vigilante killings sa dakbayan.

Mipadayag si Alarcio og kaalarma sa maong mga kaso gumikan kay bisan usa wala pay nasulbad niini, ug nagkinahanglan na kining hatagan og pagtagad sa intelligence community.

Si Gayotin nagkanayon nga maong naglisod sila pagsulbad sa mga kaso gumikan usab sa kawalay interes sa pamilya ug mga testigo sa pagbarog aron matumbok kung si kinsa ang mga suspek.

Si Alarcio sa iyang bahin miawhag sa mga kabanay sa mga biktima sa pagtabang kanila ug angayang dili mahadlok gumikan lang sa pangagpas nga polis ra usab ang mga suspek, mihangyo ang heneral nga hatagan sila og higayon sa paghimo sa ilang trabaho apan pinaagi usab sa kooperasyon sa mga pamilya ug testigos.

Si Gayotin sa pakighinabi sa Banat News mihangyo sa heneral nga ipatuman ang bag-ong pamaagi sa pagbutang niya og mga sakop sa kadalanan isip beat patrols.

Buot ni Gayotin nga ang mga beat patrols himuong mga traffic beat patrols aron di na magpunay og biya sa pwesto ang mga polis, sanglit sa pagkakaron ang beat patrol magpunay og paso-paso sa dalan maong sa ilang pagbiya dunay mahitabong krimen.