Silot sa jailguard maikyasan di ok

Wala mohatag og klarong komentaryo ang warden sa Bagong Buhay Rehabilitation Center (BBRC) Supt. Efren Nemeño batok niining giduso nga balaodnon ni Kongresista Gilbert Remulla nga nagtinguha sa pagpahamtang og silot batok niadtong mga jailguards nga ma-eskapohan og piniriso.

Apan gipadayag ni Nemeño nga dili makatarunganon kun ipasangil dayun ngadto sa mga jailguards ang tanang mga kasaypanan sa higayon nga may mga piniriso nga mopuga.

Kini tungod kay matud sa warden angay usab nga susihon kun lig-on ba ang maong bilanggoan nga dili madalidali eskapohan og mga piniriso.

Gisugyot hinuon sa warden nga sa dili pa hingpit nga mapatuman unya ang maong balaodnon gikinahanglan usab nga ayuhon ang tanang mga depekto sa mga bilanggoan dinhi sa nasud apil na ang BBRC.

Matud niya mo-eskapo gyud ang mga piniriso kun makakita kini og gamay'ng higayon.

Ubos sa maong balaodnon nga giduso ni Remulla pahamtangan og silot nga pagkabilanggo ang mga jailguards nga ma-eskapohan og mga piniriso.

Ang gisugyot nga silot diha sa maong balaodnon ni Remulla magdependi sa silot nga giatubang sa nakapuga nga piniriso ang mamahimo usab unyang atubangon sa mapugahan nga gwardiya.