Babayeng nagpahubo og mga bata sa video gikiha

Gipasakaan og kasong child abuse ug pornograpiya ang usa ka babaye nga mipasiugda sa pagpahubo sa mga batang babaye sa atubangan sa video camera nga makuha usab sa network sa mga computer.

Gihimo ang pagpasaka sa kaso human usab sa pagkasikop sa suspetsado sa gihimong pagpangronda sa kapolisan ug ilang nasakmit ang mga ebidensiya.

Ang suspetsadong gipasakaan og kaso mao si Jayde Puerto, 40, minyo ug nagpuyo sa Sitio Bayong, Kandulawan, Minglanilla.

Sila si SPO1 Romil Parcon ug PO3 Joselito Bacarisas sa kapolisan sa maong lungsod nga maoy nakatubag sa maong alarma human usab sa pagreklamo sa mga ginikanan sa mga biktima.

Ang mga batang babaye nga nagpanuigon og 8 ngadto sa 13 anyos maoy mga biktima kinsa miingon nga bugti sa ilang paghubo sa atubangan sa kamera mao usab ang salapi nga ibayad ngadto kanila.

Ang kaso giduso kagahapon sa kapolisan sa lungsod sa Minglanilla ug ang dinakpan ang gitanggong karon sa bilanggoan.