Tabang alang sa kabus nga tinun-an

Ang kagamhanan mohatag og P4,000 nga bayad sa matrikula sa matag estudyante sa tunghaang elementarya sa gobiyerno kinsa gustong adto na mag-high school sa pribadong eskuylahan.

Kini ang gibutyag ni Dr. Carmelita T. Dulangon, Schools Division Superintendent sa Talisay City Schools Division (TCSD).

Matud pa ni Dulangon nga gitawag kinig "Education Voucher System" diin kutob sa usa ka gradwado sa elementarya nga gustong moeskuyla og high school sa pribadong tulonghaan, giandaman siya sa gobiyerno og P4,000 nga tseke alang sa tibuok tuig niyang pagtungha diha sa maong eskuylahan.

Ang maong kuwarta adto ideretso paghatag sa tagdumala sa eskuylahan, matud pa ni Dulangon.

Gikonpirmar usab kini ni Dr. Miriam Braganza, Education Supervisor sa TCSD nga maoy nag-atiman sa mga pribadong tunghaan kinsa nagkanayon nga usa kini sa paagi sa kagamhanan aron maiban-ibanan ang gidaghanon sa mga nag-eskuyla sa mga tunghaang iya sa gobiyerno.