Tanod nahulog sa punoan

Patay ang usa ka barangay tanod nga nahulog sa punoan sa kahoy human kini sugoa sa iyang kapitan sa barangay didto sa Lawaan, Danao sa milabay'ng adlaw.

Ang biktima mao si Alfredo Igcaliños, 59, nagpuyo sa maong dapit ug usa ka barangay tanod sa naasoy'ng lugar.

Base sa imbestigasyon ni PO3 Glenn Manulat sa Danao Police Station, mga alas 10 sa buntag sa milabay'ng adlaw, si Igcaliños gisugo sa ilang Kapitan nga si Rolito Casuna nga kuhaan og mga sanga ang punuan sa kahoy nga miabot na sa wire sa kuryente.

Atol sa pagsaka niini sa maong punuan, si Alfredo naligas hinungdan sa pagkatagak niini sa kahoy ug nahiagum og pipila ka bun-og sa kalawasan.

Gidali og dala sa Danao District Hospital si Igcaliños ug gibalhin sa Vicente Sotto Memorial Medical Center gumikan sa grabeng kahimtang.

Nakabsan sa kinabuhi si Igcaliños mga alas 4 na sa kaadlawon sa milabay'ng adlaw human kini wala makaantos sa iyang nahiagumang samad ug bun-og sa kalawasan bunga sa pagkatagak niini.

Si Casuna nasubo sa maong aksidente ug misaad nga moabaga sa galastuhan sa kamatayon ni Alfredo.