Eksplorasyon sa lana diha sa Tañon Strait suportahan sa kapitolyo

Kagamhanan sa probinsiya sa Sugbo mosuporta sa Japan Petroleum Exploration (JAPEX) sa ipahigayon niining oil exploration sa mga lugar sa probinsiya kung dili makadaot sa kinaiyahan ug adunay koordinasyon sa probinsiya ug sa Local Government Unit (LGU) ang ipahigayong kalihokan sa maong kompaniya.

Si Gobernador Gwendolyn Garcia nagkanayon nga suportahan sa kagamhanan sa probinsiya ang maong proyekto tungod kay makahatag kini og benipisyo sa Sugbo ug sa mga Sugboanon.

Apan kinahanglan nga ang kompaniya adunay koordinasyon sa kagamhanan sa probinsiya ug sa ubang LGU nga ubos sa service contract 46 nga mao ang lugar nga gitugot sa JAPEX nga mopahigayon sa ilang kalihokan ug dili makadaot sa kinaiyahan ang ipahigayon niining proyekto.

Gitataw ni Garcia nga ang JAPEX nagpahigayon pa kini og pagtuon sa mga lugar sa probinsiya kung asa magpahigayon og oil drilling.

Niadtong milabay'ng semana ang mga opisyal sa JAPEX uban ni Guillermo Balce, undersecretary sa Department of Energy, mihatag og update ni Garcia sa gipahigayong kalihokan diha sa Tañon straight.

Matud ni Garcia nga base sa pagtuon ug mga test nga gihimo adunay nakita nga ang maong lugar positibo nga dunay makuhang lana ug gas.