Si Antonio Pogado, presidente sa Nagkahiusang Drayber sa Sugbo, miingon nga kun aprobahan gyod sa konseho ang ilang gisugyot nga ordinansahon malapas nila ang section 29 ug 62 sa Transportation and Traffic Code.
Matud ni Pogado nga ang section 29 naglatid nga ang mga lisensya sa drayber mahimo lang sakmiton kun ang modakop sa mga drayber dunay resibo nga giisyu sa Land Transportation Office.
Kun ang mga sakop sa LTO, apil na ang mga deputized agents, manakop sa mga drayber ang mga madakpan isyuhan nila og temporary operators permit.
Nasayran nga buot mugnaon sa dakbayan ang maong ordinansa aron nga bisan og ang mga sakop sa Citom armado lang og traffic citation tickets mahimo sila nga mosakmit sa lisensya sa mga drayber nga makasala.
Ang argumento ni Pogado mao nga ang Traffic Citation Ticket dili maoy resibo nga gipasabot base sa balaod.
Gitataw usab ni Pogado nga ang section 62 sa transportation and traffic Code naglatid nga ang hunta probinsyal ug konseho sa mga dakbayan ug kalungsoran gidid-an pagmugna og mga ordinansa nga supak sa mga lagda nga gilatid sa maong balaod.
Si Konsehal Sylvan Jakosalem nga maoy nangamahan sa maong ordinansa misaad nga paminawon nila ug timbang-timbangon ang baruganan sa mga drayber.
Atol sa public hearing sa konseho sa dakbayan, gitataw ni Jakosalem nga ang iyang gisugyot nga ordinansa gitumong aron matul-id ang batasan sa mga abusadong drayber.
Apan si Pogado namahayag nga dili pinaagi sa law enforcement ang makapatul-id sa mga drayber kon dili ang paghatag kanila og pamaagi nga ang ilang panginabuhian mo-asenso.